Ég var svo lánsöm að fá þessa glæsilegu bók eftir Steingrím Sigurgeirsson senda frá Forlaginu. Bókin kom í verslanir á fimmtudaginn og ætti að vera til á hverju heimili. Hún er stútfull af fróðleik um vín og gaman að blaða í henni. Bókin mun klárlega liggja á sófaborðinu hjá okkur til að grípa í á næstunni. Kærar þakkir og hamingjuóskir til Forlagsins og Steingríms með bókina.

Við áttum rólega og góða helgi. Planið var að fara í útgáfuteiti MAN magasíns á föstudagskvöldinu en þegar til kastanna kom hætti ég við. Gunnar var á fimleikaæfingu, Malín á leið á skólaball og Öggi og Gunnar á leið í Hörpu á tónleika seinna um kvöldið. Það að eyða kvöldinu heima með Jakobi lokkaði meira en allt annað og við enduðum á að baka okkur pizzu og eiga notalegt föstudagskvöld saman.

Fyrir helgi datt nýjasta Bon Appétit inn um lúguna og ég ákvað að prófa fyrstu uppskriftina í gærkvöldi.  Valið féll á Sloppy Tacos og það er óhætt að segja að engin varð svikinn af því vali. Stórgóður réttur sem mun verða á borðum hér oftar. Ekta föstudagsmatur!

Sloppy Tacos (uppskrift úr Bon Appétit)

Límónu sýrður rjómi:

• 1 bolli sýrður rjómi
• 1 msk fínrifið límónuhýði (lime)
• ¼ bolli ferskur límónusafi
• 2 msk hakkað ferskt kóríander
• 1 msk hrísgrjónaedik (rice vinegar)
• Gróft salt

Setjið öll hráefnin í skál og hrærið þeim saman. Smakkið til með salti. Setjið  plastfilmu yfir skálina og geymið í kæli í að minnsta kosti 1 klst. eða upp í 1 sólarhring.

Fylling og samsetning:

• 2 msk ólívuolía
• 900 g nautahakk
• 1 laukur, hakkaður
• 6 hvítlauksrif, fínhökkuð
• 1 dós heilir tómatar (400 g)
• 1 flaska Heinz chilisósa
• ¼ bolli Worcestersósa
• 3 msk chiliduft (ég notaði 2 msk af sterku mexíkósku chilidufti)
• 1 msk hvítlauksduft (ath. ekki hvítlaukssalt!)
• 1 msk laukduft
• 1 msk púðursykur
• 1 msk cumin
• 12 stökkar tacoskeljar, hitaðar
• rifinn cheddar ostur
• iceberg
• ferskt salsa
• ferskt kóriander
• lime bátar

Hitið 1 msk af ólívuolíu á pönnu yfir miðlungsháum hita. Setjið nautahakkið á pönnuna og steikið þar til allt hakkið er steikt, um 5 mínútur. Takið af pönnunni og leggið til hliðar.

Bætið 1 msk af ólívuolíu á pönnuna og setjið lauk og hvítlauk á hana. Steikið laukana þar til þeir byrja að brúnast, um 5 mínútur. Passið að hafa ekki of mikinn hita á pönnunni.

Hitið ofn í 200°.

Bætið tómötum á pönnunna og brjótið þá í sundur. Látið sjóða við vægan hita í 8-10 mínútur, eða þar til sósan byrjar að þykkna. Bætið nautahakki, chilisósu, Worcestersósu, chilidufti, hvítlauksdufti, laukdufti, púðursykri og cumin á pönnuna og blandið öllu vel saman. Látið sjóða í 10-12 mínútur við vægan hita og hrærið reglulega í.

Setjið fyllinguna í eldfast mót (sirka 20×30 cm) og bakið i ofninum í 30-40 mínútur.

Berið fyllinguna fram í heitum tacoskeljum með rifnum cheddar osti, iceberg, salsa, kóríander, límónu sýrðum rjóma og límónubátum.

Þegar við fórum heim frá Orlando langaði mig allra helst til að fylla ferðatöskurnar af matreiðslubókum. Ég hafði nokkrum dögum áður eytt góðum parti úr degi í Barnes & Nobles, í hættulega þægilegum hægindastól, og flett hverri bókinni á fætur annarri. Mig langaði í svo óteljandi margar, enda úrvalið æðislegt, en ég hef sem betur fer í gegnum tíðina áttað mig á því hvaða matreiðslubækur ég nota og hverjar enda upp í hillu. Uppskriftir með framandi hráefnum, flóknum eldunaraðferðum og engum myndum ná sjaldan til mín.

Á endanum fengu þrjár matreiðslubækur að fylgja mér heim, tvær eftir Ree Drummond (sem er eflaust betur þekkt sem The Pioneer Woman) og síðan áhugaverð bók sem ég greip á hlaupum í Target eitt kvöldið, Fifty Shades of Chicken. Á kápunni stendur að bókin sé “The New York Times Bestseller”, hún hefur fengið góða dóma og uppskriftirnar lofa góðu. Það var þó ekki fyrr en ég var komin heim og fór að fletta bókinni betur að ég áttaði mig á að hún er skrifuð í anda Fifty Shades of Grey.  Uppskriftirnar hafa kjánalega klámfengna forsögu, inn á milli fallegra mynda af kjúklingaréttum má finna myndir af karlmanni sem er ýmist ber að ofan eða í svuntu einni klæða að stússast í eldhúsinu og uppskriftirnar heita nöfnum eins og Roast Me All Night Long Chicken og Happy Ending Chicken. Þetta er allt voða girnilegt og flott en ég veit ekki,  getur maður boðið tengdaforeldrum sínum í kjúkling sem heitir Sexy Sliders? Ég er alla vega orðin spennt að prófa uppskriftirnar og á eflaust eftir að hóa í saumaklúbbinn í Jerked-Around eða Please Don´t Stop Chicken fljótlega.

Bækur Ree Drummond eru af öðrum toga enda mjög fjölskylduvænar og ég fæ ekki betur séð en að uppskriftirnar séu dásamlegar. Síðasta föstudagskvöld vígði ég aðra bókina þegar ég eldaði rétt sem heitir Sloppy Joe. Uppskriftin kom úr The Pioneer Woman Cooks, Food From my Frontier, og var stórkostlega góð. Svona matur hittir alltaf í mark hér heima. Það varð smá afgangur af hakkblöndunni sem var settur í frysti og mun fara ofan á pizzu næst þegar við höfum pizzukvöld.

Sloppy Joe (lítillega breytt uppskrift frá The Pioneer Woman)

• 600 g nautahakk
• 1 græn paprika, skorin smátt
• 1 laukur, skorinn smátt
• 3 hvítlauksrif, pressuð
• 1 bolli tómatsósa
• 2/3 bolli vatn
• 2 msk púðursykur
• 1 tsk chiliduft
• 1 tsk sinnepsduft
• 1/2 tsk rauðar piparflögur (red pepper flakes)
• Chili Explosion krydd (má sleppa en mér þykir það alltaf gefa hakkréttum svo gott bragð)
• Worcestershire sósa eftir smekk
• Tabasco sósa eftir smekk
• Salt og pipar eftir smekk
• 6 hamborgarabrauð

Brúnið nautahakkið á pönnu. Hellið fitunni af og bætið papriku og lauki á pönnuna. Steikið áfram og bætið hvítlauk á pönnuna. Hellið tómatsósu og vatni á pönnuna á hrærið öllu saman. Bætið púðursykri, chilidufti, sinnepsdufti, piparflögum, chili explosion, worcestershire sósu, tabasco sósu, salti og pipar á pönnuna. Hrærið öllu saman og látið sjóða undir loki við vægan hita í 20 mínútur.

Smyrjið hamborgarabrauðin með smjöri og steikið á pönnu (með smjörhliðina niður) þar til þau hafa fengið gyllta og stökka húð. Setjið nautahakksböndina á hamborgarabrauðin og berið fram með frönskum, salati, snakki eða því sem hugurinn girnist. Við settum ýmist sýrðan rjóma eða kokteilsósu á hamborgarabrauðin áður en nautahakksblandan fór á. Súpergott!

Allt hráefni í þessa uppskrift fæst í

Ég held að maí hljóti að vera annasamasti mánuður ársins. Þá er allt að gerast! Lokapróf, lokasýningar í tómstundum, tónleikar í tónlistarskólanum, skólaslit og útskriftir með viðeigandi veisluhöldum. Ég hef gaman af þessu öllu, nema kannski próflestrinum hjá krökkunum, en allt þetta húllumhæ hefur valdið því að ég hef lítið náð að dunda mér í eldhúsinu. Undanfarnar vikur hefur kvöldmaturinn oftar en ekki snúist um að gera eitthvað fljótlegt en gott. Nú er hins vegar júní runninn upp, krakkarnir að komast í sumarfrí og lífið að falla í rólegri gír.

Í dag fórum við á skólaslit í tónlistarskólanum hjá Gunnari en í síðustu viku spilaði hann á tónleikum þar. Það gekk mjög vel hjá honum en í lok lagsins kom fölsk nóta og þessi mynd náðist akkúrat á því augnabliki. Mér þykir hún dásamleg og svipurinn óborganlegur. Sjálf heyrði ég ekki að nótan væri fölsk heldur fannst hann skila laginu fullkomlega frá sér. Að sama skapi hefði hann getað spilað allt lagið falskt og mér hefði samt þótt það æðislegt…

Þó að ég viti fátt skemmtilegra en að dunda mér í eldhúsinu þá verð ég alltaf jafn glöð yfir ljúffengum réttum sem eru einfaldir og tekur stutta stund að reiða fram. Í amstri dagsins reynst oft mikill fjársjóður í slíkum uppskriftum. Þessi hakkbuff voru á boðstólnum eitt maíkvöldið hjá okkur og voru svo æðislega góð að ég er enn að hugsa um þau. Sósan var svo ljúffeng og meira að segja Malín sem þykist ekki borða beikon borðaði allt með bestu lyst. Ég bar réttinn fram með kartöflum og rifsberjahlaupi en hrísgrjón eða jafnvel bara einfalt salat dugar vel með.

Timjankrydduð hakkbuff með rjómasoðnu savoy káli

• 500-600 g blandað hakk eða nautahakk
• 200 g beikonkurl
• 1 savoykálhaus
• 3 dl rjómi (½ dl fer í buffin og 2½ dl í sósuna)
• 1 egg
• 1 epli (ég notaði gult)
• 1 hvítlauksrif
• 1 tsk þurrkað timjan
• 1 msk dijon sinnep
• salt og pipar

Hitið ofn í 225°. Blandið nautahakki, eggi, rjóma, dijonsinnepi, salti, pipar, pressuðu hvítlauksrifi og timjan saman. Smyrjið eldfast mót með smjöri. Mótið buff úr hakkblöndunni og raðið þeim í eldfasta mótið. Setjið í ofn í 15-20 mínútur. Takið úr ofninum og skerið í eitt buffið til að tryggja að þau séu fullelduð.

Steikið beikon í rúmgóðum potti. Skerið savoykálið (um 8 kálblöð, ekki nota grófustu blöðin) í strimla og bætið í pottinn með beikoninu. Steikið áfram í smá stund og stráið síðan smá hveiti yfir áður en 2,5 dl af rjóma er hellt yfir. Ef blandan verður of þykk þá er hún þynnt með smá vatni. Skerið eplið í teninga og bætið í. Saltið og piprið eftir smekk (athugið að fara varlega í saltið út af beikoninu). Látið sjóða í nokkrar mínútur eða þar til kálið er orðið mjúkt.

Allt hráefni í þessa uppskrift fæst í

Ég hef ekki alveg hangið með þessa vikuna. Þar sem mánudagurinn var frídagur þá þótti mér vera mánudagur á þriðjudeginum og þannig hefur þetta bara haldið áfram. Það er þó svo að nú styttist í helgi eftir stutta vinnuviku og ekki seinna vænna en að fara að huga að föstudagsmatnum.

Síðasta föstudagskvöld vorum við með æðislegt tacogratín í matinn og mig langar mest til að hafa það aftur á morgun. Það uppfyllir allar mínar kröfur til föstudagsmatar, er einfalt, fljótgert og æðislega gott. Meðlætið var það sem til var í ísskápnum en næst mun ég bera tacogratínið fram með góðu salati, guacamole, sýrðum rjóma og auka nachosflögum til að nota sem hálfgerða gaffla. Súúúúúpergott!

Tacogratín með papriku (uppskrift fyrir 5)

• 500 g nautahakk
• 2 rauðar paprikur
• 3/4 dós hakkaðir tómatar
• 1 poki tacokrydd
• 1 askja philadelphiaostur
• nachosflögur með ostabragði
• rifinn ostur

Steikið nautahakkið og fínhakkaðar paprikur. Hrærið tacokryddinu saman við og síðan hökkuðum tómötum.

Smyrjið botn á eldföstu móti með philadelphiaostinum. Hrærið því sem eftir er af honum saman við nautahakksblönduna og setjið hana síðan í eldfasta mótið. Stingið nachosflögum í réttinn og stráið rifnum osti yfir. Setjið í 125° heitan ofn þar til osturinn hefur bráðnað.

Berið fram með góðu salati, nachos flögum, guacamole, sýrðum rjóma, salsa eða því sem hugurinn girnist.

Allt hráefni í þessa uppskrift fæst í

Mér þykir hakk og spaghettí vera frábær hversdagsmatur. Það tekur svo stutta stund að útbúa hann og ef ég á sýrðan rjóma og chili explotion krydd þá þykir mér útkoman alltaf verða góð. Þegar ég veit að það stefnir í seinan dag þá tek ég stundum upp á því að gera kjötsósuna kvöldið áður og hita hana síðan bara upp daginn eftir á meðan spaghettíið sýður. Ef það verður afgangur nýti ég hann alltaf. Þeir fara ýmist í nestisbox inn í frysti, á brauðsneiðar smurðar með tómatsósu, kjötsósu og osti inn í ofn eða á pizzur. Þá set ég pizzasósu yfir botninn, krydda með oregano, set síðan kjötsósuna og toppa með rifnum osti. Einfalt og stórgott!

Hakk og spaghetti

• 1 laukur, hakkaður
• 25 g smjör
• 2 msk ólívuolía
• paprikukrydd
• 1/2 fræhreinsað chili, hakkað
• 3 hvítlauksrif, hökkuð
• 500 g nautahakk
• 400 g hakkaðir tómatar (1 dós)
• 1½ tsk tómatpuré
• 4 msk tómatsósa
• 3 msk kálfakraftur (kalvfond)
• 1 dl sýrður rjómi
• chili explotion (krydd í kvörn frá Santa Maria)
• salt og pipar

Hakkið laukinn og mýkið hann í smjöri og ólívuolíu við mjög lágann hita í um 10 mínútur. Saltið, piprið og kryddið með paprikukryddi. Bætið hökkuðu chili og hvítlauk saman við og látið malla aðeins áfram á pönnunni með lauknum. Bætið nautahakkinu á pönnuna. Þegar nautahakkið er fullsteikt er tómötum, kálfakrafti, tómatpuré og tómatsósu hrært saman við. Látið sjóða við vægan hita eins lengi og kostur er en að minsta kosti í 30 mínútur. Ef ykkur þykir blandan verða þurr þá bætið þið smá vatni og ólívuolíu saman við. Kryddið með salti, pipar og chili explotion. Að lokum er sýrðum rjóma hrært út í og látin sjóða með síðustu mínúturnar.

Berið fram með pasta og ferskrifnum parmesan. Ef þið eigið ferska basiliku skuluð þið ekki hika við að saxa hana yfir!

Allt hráefni í þessa uppskrift fæst í

Með fullri virðingu fyrir klassískum heimagerðum kjötbollum með kartöflumús og sósu, sem ég elska og gæti lifað á, þá er alltaf gaman að bregða út af vananum. Ég prófaði um daginn uppskrift að asískum kjötbollum sem voru mjög ólíkar þeim klassísku en ó, svo góðar og verða klárlega aftur á borðum hér fljótlega.

Asískar kjötbollur (uppskrift fyrir 4)

• 500 g nautahakk
• 1 egg
• 3 msk kálfakraftur (kalv fond)
• 1 + 1 msk rautt karrýmauk
• 1 laukur
• 1 dós kókosmjólk (400 ml)
• 1/2 dl mango chutney
• 10 þurrkuð limeblöð
• kóriander
• salt og pipar

Blandið saman nautahakki, eggi, kálfakrafti, 1 msk karrýmauki, ½ tsk salti og smá pipar. Gerið litlar kjötbollur úr blöndunni.

Fínhakkið laukinn og steikið við vægan hita á pönnu þar til hann er mjúkur en ekki farinn að dökkna. Bætið 1 msk af karrýmauki saman við og steikið saman í 1 mínútu til viðbótar. Hrærið kókosmjólk og mango chutney saman við. Setjið limeblöð og kjötbollurnar í sósuna og látið sjóða undir loki við vægan hita í um 7 mínútur. Smakkið til með salti og pipar. Stráið kóriander yfir eftir smekk og berið fram með hrísgrjónum.

Allt hráefni í þessa uppskrift fæst í

Þar sem það styttist í helgina datt mér í hug að koma með hugmynd að föstudagsmat. Það hljóta fleiri en ég að vera byrjaðir að huga að honum. Það er jú svoooo notalegt að koma heim eftir vinnudaginn með helgarfrí framundan og mér þykir tilheyra að gera vel við sig með góðum mat. 

Mér þykir oft gott að vera með tacos á föstudagskvöldum því það er bæði fljótlegt og gott. Það má útfæra það á ýmsan hátt og gaman að breyta til og prófa sig áfram. Þetta tacogratín vorum við með um síðustu helgi og okkur þótti það æðislegt. Strákarnir notuðu nachosflögurnar sem hnífapör í gratínið sem var stórsniðugt og gott. Það tekur enga stund að útbúa réttinn og hann er því kjörinn föstudagsmatur!

Tacogratín

• 1 krukka tacosósa (225 g)
• 1 1/2 dl ostasósa (þessar í glerkrukkunum hjá mexíkóvörunum í búðunum)
• 1 dl maísbaunir
• 500-600 g nautahakk
• 1 pakki tacokrydd
• 2,5 dl sýrður rjómi
• 2,5 dl rifinn ostur, t.d. cheddar
• nokkrir kirsuberjatómatar

Setjið tacosósu í botn á eldföstu móti og setjið ostasósu yfir í litlum doppum (það getur verið erfitt að dreifa úr henni þannig að mér þykir best að nota litla skeið og setja ostasósuna sem víðast yfir tacosósuna). Setjið maísbaunir yfir. Steikið nautahakk á pönnu og kryddið með tacokryddi. Setjið nautahakkið yfir maísbaunirnar. Skerið kirsuberjatómata í bita og dreifið yfir. Hrærið að lokum saman sýrðum rjóma og rifnum osti og setjið yfir réttinn. Setjið í 200° heitan ofn í ca 15-20 mínútur, eða þar til osturinn er bráðnaður og rétturinn heitur i gegn.

Berið fram með nachos, guacamole og góðu salati.

Allt hráefni í þessa uppskrift fæst í

Eins og mér þykir gaman að taka fram jólaskrautið fyrir aðventuna þá finnst mér líka alltaf jafn gott að pakka því niður aftur. Og á hverju einasta ári skipti ég jólaskrautinu út fyrir ferska túlípana. Mér þykir það hreinlega tilheyra því að pakka niður jólunum.

Ég hef undanfarin ár birt hér lista yfir vinsælustu uppskriftir ársins og ætla að halda í þá hefð. Mér þykir alltaf áhugavert að sjá hvaða uppskriftir það eru sem hafa vakið mestu lukku og það gleður mig að sjá tvo fiskrétti á listanum í ár. Að sama skapi er ánægjulegt að sjá sumar uppskriftir á listanum ár eftir ár. Ég bendi á að listann má vel nýta sem vikumatseðill, enda bæði fjölbreyttur og ljúffengur.

Kjúklingur með sætum kartöflum, spínati og fetaosti er nú vinsælasta uppskrift ársins annað árið í röð. Uppskriftinni hefur verið deilt yfir 10.000 sinnum og skildi engan undra. Dásamlega góður réttur sem er í senn hollur, fljótgerður og einfaldur að útbúa.

Í öðru sæti er hakkabuff með fetaosti. Heimilismatur eins og hann gerist bestur!

Í þriðja sæti er fiskur í okkar sósu. Þessi fiskréttur er einn af mínum uppáhalds og það gleður mig að sjá hann svona ofarlega á lista.

Mexíkóskur mangókjúklingur var fjórða vinsælasta uppskrift ársins. Æðislegur réttur sem mér þykir passa sérlega vel á föstudagskvöldum.

Fimmta vinsælasta uppskrift ársins var í öðru sæti á listanum í fyrra. Einföld og góð skúffukaka sem svíkur engan og er ómótstæðileg með ískaldri mjólk.

Uppáhalds bananabrauðið heldur sjötta sæti listans frá því í fyrra. Ég vil ekki vita hversu oft ég hef bakað þetta brauð en við fáum ekki leið á því.

Í sjöunda sæti er mexíkósk kjúklingasúpa. Hér er á ferðinni uppskrift sem ég gríp oft til og hún vekur alltaf lukku. Dásamleg súpa í alla staði.

Pizza sem klikkar aldrei er áttunda vinsælasta uppskriftin. Hún stendur alltaf fyrir sínu og er öruggt kort á föstudagskvöldum.

Í níunda sæti er ofnbakaður fiskur í paprikusósu. Namm!

Tíunda vinsælasta uppskriftin var sú vinsælasta fyrir tveimur árum, milljón dollara spaghetti. Barnvænn réttur sem slær alltaf í gegn.

Öll hráefni í þessar uppskriftir fást í

Mér þykir janúar hafa liðið óvenju hratt og dagarnir hreinlega hlaupa frá mér. Uppskriftirnar sem ég á eftir að setja hingað inn safnast upp og það er orðið af nógu að taka. Þó að helgin sé framundan má ég til með að setja inn dásamlega uppskrift að hversdagsmat sem sló í gegn hér á heimilinu í vikunni, hakkbuff í raspi.

Þegar ég gerði buffinn setti ég öll hráefnin fyrir utan raspinn í hrærivélina og blandað þeim saman þar. Síðan bræddi ég smjörlíki á pönnu (mér þykir gott að steikja upp úr smjörlíki, það brennur ekki eins og smjörið vill gera), mótaði buff, velti upp úr raspinum og steikti í nokkrar mínútur á hvorri hlið. Síðan kláraði ég að elda þau í ofninum á meðan ég gerði sósuna og kartöflumús. Einfalt og súpergott!

Uppskriftin er stór og því getur verið snjallt að frysta helminginn af buffunum til að eiga síðar.

Hakkbuff í raspi (fyrir 10 manns)

• 500 g nautahakk
• 500 g svínahakk
• 2 egg
• 1 ½ dl rjómi
• 2 msk dijonsinnep
• salt og pipar
• rasp

Blandið öllum hráefnunum fyrir utan raspinn saman í skál. Mótið buff úr blöndunni, veltið þeim upp úr raspi og steikið á pönnu þar til þau fá fallega steikingarhúð. Raðið steiktu buffunum í smurt eldfast mót og látið í 180° heitan ofn þar til fullelduð.

Sósa:

• steikingarsoðið sem er eftir á pönnunni
• 2½ dl vatn
• 2½ dl rjómi
• 1½ – 2 grænmetisteningar
• ½ msk rifsberjahlaup
• salt og pipar
• maizena til að þykkja sósuna og jafnvel sósulit til að dekkja hana (má sleppa)

Hellið vatninu á pönnuna og látið sjóða saman við steikingarkraftinn sem er á pönnunni eftir buffin. Hrærið hann upp svo að ekkert verði eftir á pönnunni. Sigtið yfir í pott og bætið rjóma, grænmetisteningi og rifsberjahlaupi saman við. Látið sjóða saman og smakkið til með salti og pipar, og jafnvel meiri grænmetiskrafti. Þykkið sósuna með maizena og viljið þið dekkri sósu bætið þá nokkrum dropum af sósulit  út í.

Berið fram með kartöflumús og rifsberjahlaupi.

Allt hráefni í þessa uppskrift fæst í

Eftir bolludag og sprengidag í beinu framhaldi mætti kannski ætla að enginn hefði áhuga á bollum í neinu formi á næstunni en ég þori nánast að fullyrða að þessar kjötbollur fá ykkur til að skipta um skoðun. Þær eru guðdómlegar! Ég hef bæði boðið upp á þær í matarboði sem og lífgað upp á hversdagsleikann með þeim, alltaf við rífandi lukku. Með þessum verður enginn fyrir vonbrigðum!

Kjötbollur með mozzarella og basiliku (uppskrift frá Matplatsen)

• 600 g nautahakk eða blanda af nauta- og svínahakki
• 1 poki með mozzarella
• 1/2 pakkning fersk basilika
• 4 sólþurrkaðir tómatar
• 1 dl rjómi
• 1 egg
• salt og pipar
• smör til að steikja í

Sósa:

• steikingarsoð
• 2 dl rjómi
• 100 g philadelphiaostur
• 1/2 grænmetisteningur

Blandið hakki, eggi, rjóma, hakkaðri basiliku, hökkuðum sólþurrkuðum tómötum og mozzarella skornum í litla teninga. Saltið og piprið og mótið bollur.

Steikið bollurnar við miðlungsháan hita, í nokkrar mínútur og á öllum hliðum, í vel af smjöri. Takið bollurnar af pönnunni og hrærið rjóma, philadelphia og grænmetisteningi í steikingarsoðið. Látið suðuna koma upp og leggið síðan bollurnar í sósuna. Látið sjóða við vægan hita þar til bollurnar eru fulleldaðar. Verði sósan of þykk þá er hún þynnt með vatni.

Allt hráefni í þessa uppskrift fæst í

Mér þykir þessi vorönn hafa liðið svakalega hratt og nú er síðasta skólavikan fyrir sumarfrí runnin upp hjá strákunum. Eins og oft vill verða í lok annar (og í lífinu almennt!) þá er í nógu að snúast og kannski ekki alltaf tími til að standa yfir pottunum. Þá er gott að geta gripið til einfaldra uppskrifta og ekki skemmir fyrir þegar hún er svona góð. Krakkar elska þennan mat og á meðan ég kýs að raspa parmesan yfir diskinn minn vilja krakkarnir bara tómatsósu. Einföld, ódýr og stórgóð máltíð!

Nautahakks- og makkarónupanna (uppskrift fyrir 4-5)

• 1 laukur, hakkaður
• 2 hvítlauksrif, pressuð
• 1 msk ólívuolía
• 500 g nautahakk
• 2 dósir (samtals 800 g) hakkaðir tómatar
• 1 dós (400 ml) vatn
• 225 g makkarónur, óeldaðar
• salt og pipar
• parmesan til að rífa yfir (má sleppa)

Steikið lauk og hvítlauk í ólívuolíu við vægan hita þar til mjúkt. Takið af pönnunni og leggið til hliðar. Brúnið nautahakkið,  hellið vökvanum frá og kryddið hakkið eftir smekk. Bætið tómötum, vatni (notið aðra tómatdósina til að mæla vatnið), hráar makkarónur, salt, pipar, lauk- og hvítlauksblönduna og grænmetistening á pönnuna og látið sjóða í 15-20 mínútur, eða þar til makkarónurnar eru mjúkar. Berið fram með góðu brauði og/eða salati. Í þetta sinn voru það kirsuberjatómatar sem fengu að skreyta réttinn hjá mér.

Allt hráefni í þessa uppskrift fæst í

Nú þegar styttist í helgina má ég til með að gefa uppskrift af æðislegum helgarmat. Ég gæti vel lifað á Sloppy Joe, hef prófað all margar uppskriftir og þessi er sú langbesta sem ég hef smakkað. Kjötsósan er svo bragðgóð að það nær engri átt! Hún er sett í hamborgarabrauð sem hafa verið smurð með smjöri og hituð í ofni þannig að þau fá stökka skorpu og verða mjúk að innan. Þið getið rétt ímyndað ykkar hvað þetta er gott, stökkt og mjúkt brauðið með bragðmikilli kjötsósunni. Svo brjálæðislega gott! Herlegheitin bar ég fram með djúpsteiktum frönskum, Hellmans mæjónesi, kokteilsósu og hrásalati. Ekta föstudagsmatur!

Það varð smá afgangur af kjötsósunni hjá okkur sem ég frysti. Hann endaði síðan ofan á pizzabotni eitt kvöldið þegar við komum seint heim og enginn tími gafst til að elda. Þá kom sér vel að eiga pizzadeigsrúllu í ískápnum sem ég smurði með pizzasósu, setti kjötsósuna yfir og vel af osti. Pizzuna bar ég síðan fram með hrásalati. Svakalega gott!

Sloppy Joe

• 3 msk smjör
• ½ bolli laukur, fínhakkaður
• 1 rauð paprika
• 1½ tsk hvítaukur, fínhakkaður
• 450 g nautahakk
• 2½ msk púðursykur
• 2 msk Dijon sinnep
• 2 msk Worcestershire sósa
• 1 msk chili krydd (þið getið byrjað á hálfri msk og smakkað ykkur áfram)
• 1 tsk reykt paprikukrydd
• 1 bolli tómatsósa
• ⅓ bolli eplaedik
• salt og pipar
• hamborgarabrauð til að bera réttinn fram í

Bræðið smjör á pönnu við miðlungsháan hita. Þegar smjörið hefur bráðnað er laukurinn settur á pönnuna og látinn mýkjast. Bætið papriku og hvítlauk á pönnuna og steikið í 1 mínútu (hrærið aðeins í á meðan). Bætið nautahakkinu á pönnuna og látið það brúnast aðeins (það tekur um 3 mínútur). Bætið púðursykri, worcestershire sósu, chilikryddi og reyktu paprikukryddi á pönnuna. Hrærið í og látið steikjast í hálfa mínútu, bætið þá tómatsósu og eplaediki út í. Látið sjóða saman í 5 mínútur og smakkið til með salti og pipar. Það má þá bera réttinn fram en því lengur sem hann fær að sjóða því betri verður rétturinn. Best er að leyfa honum að sjóða við vægan hita í klukkustund.

Smyrjið hamborgarabrauð með smjöri og hitið í ofni þar til brauðin hafa fengið stökka skorpu en eru mjúk að innan. Fyllið hamborgarabrauðin með nautahakkinu og berið fram.

Allt hráefni í þessa uppskrift fæst í

Mér þykir gaman að brjóta upp hversdagsleikan með góðum mat og jafnvel vínglasi með í miðri viku, en heimilismatinn má þó ekki vanmeta. Eins og þessi parmesanbuff sem eru frábær hversdagsmatur. Hversdagsmatur sem gæti skammlaust verið helgarmatur og á borðum í matarboðum. Hversdagsmatur sem getur ekki annað en vakið lukku. Parmesan osturinn gefur buffunum gott bragð sem nýtur sín einnig vel í sósunni. Krakkarnir fengu sér öll aftur á diskinn og óhætt að segja að máltiðin hafi vakið lukku. Stormandi lukku!

Parmesanbuff í rjómasósu

• 700 g nautahakk
• 2 egg
• 100 g fínrifinn parmesan
• um 2 dl vatn
• 2 tsk salt
• svartur og hvítur pipar

Blandið öllum hráefnum saman (ég skelli öllu í hrærivélina og læt hana taka nokkra snúninga) og mótið 9 buff. Steikið í 4-5 mínútur á hvorri hlið í vel af smjöri (eða smjörlíki). Takið buffin af pönnunni og gerið sósuna.

Sósa:

• 2 dl vatn
• 1-2 msk kálfakraftur (kalv fond)
• 2 dl rjómi
• 2 dl mjólk
• smá skvetta af sojasósu
• smá rifsberjahlaup
• maizena (til að þykkja)

Hellið vatninu á pönnuna sem buffin voru steikt í (ekki hreinsa pönnuna áður) og bætið kálfakraftinum saman við. Ef þurfa þykir má síðan hella soðinu í gegnum sigti og setja það svo aftur á pönnuna. Hrærið rjóma og mjólk saman við og leyfið að sjóða í nokkrar mínútur. Smakkið til með sojasósu og rifsberjahlaupi. Þykkið sósuna með maizena og látið parmesanbuffin að lokum í sósuna og sjóðið saman við vægan hita í nokkrar mínútur.

Allt hráefni í þessa uppskrift fæst í

Á laugardaginn fórum við strákarnir og mamma í Smáralindina. Þar röltum við um, versluðum aðeins og enduðum ferðina á að fara í Smárabíó að sjá sænsku myndina Maður sem heitir Ove. Við mamma vorum báðar búnar að lesa bókina og vorum sammála um að myndin stóð undir væntingum, hún er yndisleg! Eftir að hafa borðað popp, gos og nammi í bíóinu var lítill áhugi á að borða kvöldmat og því var ákveðið að hafa bara snarl þegar leið á kvöldið. Snarlið endaði sem risa nachosfat sem við borðuðum yfir sjónvarpinu. Súpergott!

Súper nachos

• 500 g nautahakk
• 1/2 laukur, hakkaður
• 1/2 tsk chilikrydd
• 1 tsk paprikukrydd
• 1/2 tsk kúmín (ath. ekki kúmen)
• 1/2 tsk rauðar piparflögur
• salt og pipar
• 1 dós pinto baunir
• 1,5 dl vatn
• Nachos flögur
• 7 -8 dl rifinn ostur, t.d. blanda af cheddar og mozzarella
• avocado
• sýrður rjómi
• ostasósa

Mýkið laukinn í olíu á pönnu yfir miðlungsháum hita. Bætið nautahakkinu við og steikið þar til fulleldað. Kryddið og bætið baunum og vatni á pönnuna. Smakkið til, það gæti þurft að krydda betur. Látið malla við vægan hita á meðan hin hráefnin eru undirbúin.

Salsa sósa:

• 5-6 plómutómata (eða aðra góða tómata), skornir í teninga
• 1/2 laukur
• 1 jalapeno, fínhakkað
• 1/2 askja kóriander, saxað
• safi af 1 lime
• 1/2 tsk salt

Blandið öllu saman.

Sett saman:

Setjið nachosflögur í botninn á eldföstu móti. Setjið smá ostasósu yfir, síðan eitt lag af nautahakksblöndu og að lokum rifinn ost. Setjið annað lag af nachosflögum yfir, smá ostasósu, síðan nautahakksblöndu og ost. Endurtakið þannig að alls séu þrjú lög. Setjið í 180° heitan ofn þar til osturinn hefur bráðnað. Setjið salsasósuna yfir ásamt avocadó, sýrðum rjóma og ostasósunni (gott að hita hana aðeins í örbylgjuofni áður).

Allt hráefni í þessa uppskrift fæst í

Það má eflaust halda að það að vera matarbloggari sé nokkuð hættulaust starf. Ég get þó upplýst ykkur um að ég lagði líf mitt í hættu við að mynda þennan rétt. Á meðan krakkarnir biðu full tilhlökkunar að smakka á þessari nýju útfærslu af tacogratíni (sem er með því besta sem við vitum!) var ég, eins og svo oft áður, að álpast við að taka mynd af réttinum fyrir bloggið. Eitthvað hallaði ég stólnum sem ég sat á aftur til að ná betri mynd sem fór nú ekki betur en svo að ég missti jafnvægið, með þeim afleiðingum að ég flaug á hausinn og fékk í leiðinni þrjá stóla yfir mig. Svipurinn á Malínu var óborganlegur, hún var að springa úr hlátri en þorði ekki fyrir sitt litla líf að láta það eftir sér að hlægja ef ske kynni að ég væri slösuð, sem ég var ekki. Ég fékk þó myndarlegan marblett sem gaf okkur regluleg hlátursköst í heila viku.

Rétturinn var alveg hreint dásamlega góður og krakkarnir elskuðu hann! Ég bauð upp á hann yfir Eurovision (sem við gátum varla horft á vegna þess að við vorum enn í hláturskasti yfir fallinu mínu) en mér þykir hann passa svo vel á föstudagskvöldum þegar öllum langar í eitthvað gott og ég vil eyða sem styðstum tíma í eldhúsinu. Ég keypti ferskt guacamole í Hagkaup (það fæst bara um helgar) sem ég bar fram með réttinum ásamt heitri ostasósu (keypti í glerkrukku) og nachos, en ferskt salat passar líka vel með. Ef það eru fullorðnir í mat er ekki úr vegi að bjóða upp á kaldan bjór með, eins og t.d. Corona með límónusneið í.

Að lokum fær myndin sem varð mér nánast að bana (engin dramatík) að fylgja með. Fókusinn hefur greinilega farið í vitleysu við fallið og lent á kertastjakanum í staðin fyrir matnum, sem er sko í fínu lagi mín vegna því mér þykir hann svo fallegur. Vänskapsknuten frá Svenskt tenn, sem hefur staðið á óskalistanum leeeengi og var keyptur í síðustu Stokkhólmsferð. Maður getur víst alltaf á sig kertastjökum bætt!

Tacogratín

• 1 laukur
• 1 hvítlauksrif
• 500 g nautahakk
• 1 bréf tacokrydd (28 g)
• 1 dl vatn
• 1 krukka tacosósa (230 g)
• 1 lítil dós maís (280 g)
• 2-3  tómatar
• 2 hnefafylli tortillaflögur
• 1 askja texmex smurostur (250 g)
• 1 dós sýrður rjómi (180 g)
• 2 dl rifinn ostur

Hitið ofninn í 225°.

Hitið pönnu og bræðið smá smjör á henni. Hakið laukinn og rífið hvítlauksrifið og steikið upp úr smjörinu þar til mjúkt og bætið þá nautahakkinu á pönnuna og steikið þar til fulleldað. Bætið tacokryddi, vatni og tacosósu á pönnuna og hrærið saman við nautahakkið. Bætið maísbaunum á pönnuna og látið allt sjóða saman við vægan hita í 5 mínútur.

Setjið nautahakksblönduna í eldfast form. Myljið tortillaflögurnar örlítið og hrærið þeim saman við nautahakksblönduna. Hrærið saman texmex smurosti og sýrðum rjóma og setjið yfi rnautahakkið. Skerið tómatana í bita og setjið yfir sýrðu rjómablönduna. Setjið að lokum rifinn ost yfir og stingið nokkrum nachosflögum ofan í. Setjið í ofninn í 15 mínútur. Berið fram með salati, guacamole, ostasósu og auka nachosflögum.

Allt hráefni í þessa uppskrift fæst í

Síðan ég byrjaði að blogga fyrir rúmum 4 árum hef ég fengið ótal margar fyrirspurnir um Kitchenaid tækin mín. Fyrir helgina bætti ég langþráðu tæki í safnið og ákvað í kjölfarið að það væri kannski snjallt að bjóða ykkur í smá ferð um eldhúsið mitt og sýna ykkur eldhústækin sem ég hreint út sagt gæti ekki verið án.

Fyrst ber að nefna Kitchenaid hrærivélina mína, enda er hún búin að vera í STÖÐUGRI notkun síðan ég eignaðist hana sumarið 2002. Ég nota hana oft í viku og hún hefur aldrei nokkurn tímann klikkað eða þurft neitt einasta viðhald. Ég gæti ekki án hennar verið! Ég nota hana bæði í bakstur og í matargerð. Kökur, pizzadeig, brauð, rjómi, kartöflumús, hakkblöndur… allt fer í vélina. Hún er einföld í notkun og falleg á borði. Ég elska hana.

Blandarann eignaðist ég á sama tíma og hrærivélina, þ.e. fyrir rúmum 14 árum. Þessi græja hefur líkt og hrærivélin verið notuð óspart og hefur staðið sig eins og hetja. Hún á ekki í neinum vandræðum með að mylja klaka og frosna ávextir og ég hef gert óteljandi boozt (þessi er í uppáhaldi) og drykki (þessi er alltaf vinsæll) í blandaranum. Ég hef ekki farið mjúkum höndum um hann og hef tvisvar þurft að fara með blandarann í Einar Farestveit eftir að hafa brotið könnuna og eytt upp tökkum undir honum. Í bæði skiptin fékk ég frábæra þjónustu, varahlutirnir voru til á lager og kostuðu lítið. Sú verslun fær mín bestu meðmæli! Ég hef keypt allar Kitchenaid vörurnar mínar þar og hef alltaf fengið persónulega og góða þjónustu. Og hvernig tókst mér að brjóta könnuna? Það duga sko engin vettlingatök til því hún er bæði þykk og vegleg. Það getur þó gerst á bestu heimilum þegar verið er að setja matskeið af chiafræjum í booztið að matskeiðinni sé í leiðinni hent ofan í blandarann og svo allt keyrt í gang.

Ég hef fengið nokkrar fyrirspurnir um hvítu græjuna sem sést glitta í á forsíðumyndinni. Þetta er matvinnsluvélin mín. Þegar ég ákvað að kaupa mér matvinnsluvél kom engin önnur til greina en þessi, bæði vegna þess að Kitchenaid vörurnar mínar hafa reynst mér vel og líka vegna þess að mér þykir hún vera nett og falleg á borði. Ég vil hafa fallegt í kringum mig og þau tæki sem mér þykja ekki falleg fá einfaldlega ekki að standa frammi. Ég hef þó lært það af reynslunni að þau tæki sem ég geymi ofan í skúffum eða inni í skápum nota ég sjaldan, því ég nenni ekki að draga þau fram. Fyrir mig eykur það notagildið til muna að hafa tækin á eldhúsborðinu. Það á svo sannarlega við um matvinnsluvélina mína, ég nota hana í allt mögulegt af því það er svo einfalt. Ef það þarf að hakka hnetur, gera sósur eða annað smáræði þá nota ég litlu skálina sem fylgir vélinni. Ég veit ekki hvernig ég fór að áður en ég eignaðist matvinnsluvélina.

Nýjasta viðbótin í Kitchenaid safnið mitt er brauðristin. Það sem mig hefur lengi langað í hana! Ég hef allt of oft keypt mér ódýrar brauðristir sem hafa varla dugað út árið. Síðustu tvær hafa dáið með látum og ég held að Malín sé enn að jafna sig eftir sprenginguna sem varð hér um daginn þegar síðasta brauðristin gaf upp öndina. Þá ákvað ég að fjárfesta í góðri brauðrist og það kom engin önnur til greina en þessi. Hún er algjör draumur! Ristar beyglur (það er svo dásamlega notalegt að rista beyglu með morgunkaffinu og smyrja með rjómaosti og sultu), samlokur (þvílíkur munur að geta ristað samlokur í brauðristinni í staðin fyrir að vera með sér samlokugrill sem þarf að taka fram og hita) og svo auðvitað brauðsneiðar. Ef brauðið er ekki tekið úr ristinni þá setur brauðristin hana sjálfkrafa aftur niður og heldur henni heitri. Lúxus! Samlokuklemman er hér á myndinni fyrir neðan, með óristaðri samloku í, og á neðri myndinni er ristuð brauðsneið. Við erum í skýjunum með þessa nýjustu viðbót í eldhúsið, svo ég tali nú ekki um hvað hún er falleg á borði.

Ég hef engan áhuga á að fylla eldhúsið mitt af tækjum og tólum, heldur vel frekar færri og vönduð tæki sem ég veit að nýtast vel. Það er lítið spennandi að vera með troðfulla skápa og skúffur af hlutum sem nýtast illa. Ég mæli með að vanda valið þegar verið er að fjárfesta í eldhústækjum, það marg borgar sig til lengri tíma. Síðan er óneitanlega skemmtilegra að stússast í eldhúsinu með góð verkfæri.

En að uppskriftinni sem sló svo rækilega í gegn hér heima um daginn, heimalagaðar kjötbollur í möffinsformi. Það er allt gott við þessa uppskrift! Kjötbollurnar eru himneskar á bragðið og súpereinfaldar í gerð. Öllum hráefnunum er einfaldlega húrrað saman og sett í möffinsform. Með kjötbollunum bar ég fram kartöflumús, rifsberjahlaup og sósu sem er út úr þessum heimi góð, uppskriftin af henni er hér. Þetta verðið þið að prófa!!

Kjötbollur í möffinsformi (uppskriftin gefur um 10 bollur)

• um 500 g nautahakk (1 bakki)
• ½ dl haframjöl
• ½ dl parmesan ostur (vel þjappað)
• 1 egg
• ½ dl tómatsósa
• ½ tsk hvítlaukskrydd
• salt og pipar
• 1 tsk Worcestershire sósa
• 1 ½ – 2 dl af því grænmeti sem til er (t.d. paprika, rauðlaukur og sveppir, eða brokkólí og rifnar gulrætur…. allt gengur!)

Hitið ofninn í 180°. Blandið öllum hráefnunum saman í skál (ég nota k-ið á hrærivélinni, en það er líka hægt að nota bara hendurnar eða sleif). Þjappið blöndunni í möffinsform (ég spreyja það áður með PAM). Setjið smá tómatsósu yfir og bakið í 30-35 mínútur.

Allt hráefni í þessa uppskrift fæst í

Svakalega hefur kólnað hratt undanfarna daga. Ég sest ekki orðið upp í bílinn án þess að setja hitann á sætinu í botn og þegar ég fór í stutta göngu í gærkvöldi hélt ég að nefið myndi detta af mér. Það er á svona köldum dögum sem mér þykir góður heimilismatur sérlega lokkandi og þegar ég eldaði þennan dásamlega heimilismat um daginn fannst mér lífið svo ljúft, þrátt fyrir kuldann og skammdegið.

Uppskriftin fylgir mér frá Svíþjóðarárunum og er alveg hreint æðislega góð. Þennan rétt þekkja allir sem hafa dvalið í Svíþjóð þar sem hann er vinsæll hversdagsmatur. Rétturinn er svo einfaldur og góður að mér finnst að allir ættu að prófa hann. Ég ber réttinn fram með bestu rjómasósunni (ekki sleppa henni, hún passar svo vel með), kartöflum, sultu og hrásalti fyrir þá sem það vilja. Haustleg og dásamlega góð máltíð!

Kálbúðingur

• 1 lítill hvítkálshaus (um 1 kg)
• smjör til að steikja í
• 1-2 dl vatn
• 2 msk síróp
• salt
• 400 g nautahakk
• 1 egg
• ca 1 tsk Kød & Grill krydd (eða annað krydd)
• 1 dl vatn
• salt og pipar

Skerið hvítkálið í litla bita og steikið þá í smjöri. Setjið smá vatn annað slagið á pönnuna svo hvítkálið brenni ekki. Saltið og piprið. Þegar hvítkálið er orðið mjúkt þá er sírópi helt yfir og látið steikjast í nokkrar mínútur til viðbótar.

Blandið nautahakki saman við egg, vatn og krydd.

Setjið helming af hvítkálinu í botn á eldföstu móti. Setjið hakkblönduna yfir og sléttið yfirborðið. Setjið seinni helminginn af hvítkálinu yfir. Bakið við 175° í um 45 mínútur. Ef hvítkálið gerir sig líklegt til að brenna þá er álpappír settur yfir.

Rjómasósa

• 3 dl rjómi
• 1,5 dl sýrður rjómi
• 1 kjúklingakraftsteningur
• 1 msk sojasósa
• 1 msk rifsberjahlaup
• 1 msk hveiti, hrært saman við smá vatn (eða sósuþykkir)
• salt og pipar

Blandið öllu saman í pott og látið suðuna koma upp. Látið sjóða við vægan hita í 5 mínútur og smakkið til.

Öll hráefni í þessar uppskriftir fást í

Það hefur myndast sú hefð hér heima að horfa saman á jólamyndir á aðventunni. Þetta eru notalegar stundir sem okkur þykir öllum vænt um og eru orðnar stór þáttur í jólaundirbúningnum. Undanfarin ár hef ég safnað saman lista yfir jólamyndir og mér datt í hug að setja hann hingað inn ef fleiri geta notið góðs af. Sumar þeirra horfum við á ár eftir ár, á meðan aðrar hanga óséðar á listanum. Þegar kemur að jólabíómundum vilja margir meina að Die Hard 1 sé besta jólamynd allra tíma en ég á erfitt með að taka undir það. Sjálf vel ég The Holiday, Love Actually eða Bridget Jones alla daga fram yfir Die Hard. Hvað krakkana varðar þá held ég að National Lampoon´s christmas vacation, Christmas with the Kranks og Home alone séu í uppáhaldi. Hér kemur listinn og hver mynd er með link á IMDb svo hægt sé að kynna sér þær betur:

• The Holiday
• Love Actually
• Bridget Jones
• Home alone
• Elf
• National Lampoon´s christmas vacation
• Deck the Halls
• You´ve got mail
• The Grinch
• Jack Frost
• Bad Santa
• Falling in love
• It´s a Wonderful Life
• Christmas with the Kranks
• The Family Stone
• Miracle on 34th street
• Four Christmases

Nú þegar líður að annarri aðventuhelginni eru eflaust einhverjir farnir að huga að helgarmatnum. Jakob gerði matarmikið nachos um daginn með nautahakki, ostasósu, salsa og guacamole sem var svo æðislega gott að ég má til með að benda á uppskriftina. Ég kaupi ferskt guacamole í Hagkaup og hef staðið í þeirri trú að það fáist bara á föstudögum en mér til mikillar gleði sá ég það í Hagkaup í Smáralind í gær. Það er því vonandi farið að fást daglega. Við borðuðum nachosið yfir sjónvarpinu og mér finnst alveg upplagt að bjóða upp á það yfir jólamynd annað kvöld. Mín besta tillaga er að hendast í sturtu strax eftir vinnu, fara í náttfötin og koma sér síðan vel fyrir í sjónvarpssófanum yfir jólamynd og með nachos í kvöldmat. Í eftirrétt er hægt að hafa nammi. Notalegheit í hæstu hæðum!

Nachos

1 pakki nautahakk
1 poki Santa Maria taco krydd
1 poki Tostitos (við vorum með eitthvað annað merki)
1 stk Tostitos ostasósa
1 krukka Santa Maria jalepeno (hægt að sleppa)
1 pk pizzaostur
1 stk sýrður rjómi 18%
1 stk Tostitos salsa
Guacamole

 

 

• ¾ bolli tómatsósa í dós
• 2 msk púðursykur
• 1 msk tómatpúrra
• 2 tsk Worcestershire sósa
• ½ tsk salt
• ¼ tsk mulinn svartur pipar

Hrærið öllu saman og leggið til hliðar.

• 2 bollar ósoðið pasta
• 1 msk olía
• ¾ bolli hakkaður laukur
• 1 græn paprika, skorin smátt
• 2 hvítlauksrif, pressuð eða fínhökkuð
• 225 g nautahakk
• 1 bolli rifinn cheddar ostur

Sjóðið pastað eftir leiðbeiningum á pakkningu.

Hitið olíu á pönnu við miðlungsháan hita og steikið lauk, papriku og hvítlauk þar til mjúkt. Bætið nautahakki á pönnuna og steikið þar til fulleldað. Bætið þá sósunni á pönnuna ásamt soðnu pastanu og setjið rifinn ostinn yfir. Lækkið hitann undir pönnunni og blandið varlega saman þar til osturinn hefur bráðnað og allt hefur blandast vel.

Allt hráefni í þessa uppskrift fæst í

Í kvöld fer lítið fyrir eldamennskunni hjá mér því ég er að fara í saumaklúbb. Áður en ég fer ætla ég þó að hendast í Hagkaup í Smáralindinni því ég sá að það er 20% afsláttur af snyrtivöru þar í kvöld út af konukvöldi. Tímasetningin gæti ekki verið heppilegri því ilmvatnið mitt er að klárast og augnblýanturinn er á síðustu metrunum. Síðan má alltaf á sig glossum bæta, sérstaklega þegar það er afsláttur. Áður en ég hleyp út má ég þó til með að setja inn uppskrift af nautahakkshamborgurum sem mér þykja passa svo vel á helgarmatseðilinn. Ég sá þá fyrir löngu á Pinterest og lét loksins verða af því að elda þá um daginn. Einfaldir og súpergóðir!

Nautahakkshamborgarar – lítillega breytt uppskrift frá Kevin & Amanda